Hoxe no CEIP Bibei, dende a coordinación do Club de Ciencia, tiveron lugar unhas charlas sobre reciclaxe, impartidas por un representante de SOGAMA a todo o alumnado de primaria.
Estas charlas forman parte dun programa gratuito que leva a cabo SOGAMA nos colexios de Galicia co gallo de concienciar ao alumnado sobre como reciclar para conseguir unha maior sostentibilidade.
O alumnado de 1º Ciclo foi o encargado de pechar as actividades relacionadas coas conmemoracións do 20N e 25N.
Da man de Outonía leváronse a cabo uns talleres co título "Pintámolo patio", que consistiron nunha proposta de diagnóstico do patio en chave coeducativa e participativa co alumnado.
O noso agradecemento a Araceli polo seu bo facer, e á ANPA por achegarnos, unha vez máis, esta actividade tan enriquecedora.
Seguindo coas actividades propostas dende a ANPA para conmemorar o Día Universal da Infancia e do 25N, hoxe contamos con Susana de Pinchacarneira que levou a cabo talleres co alumnado de Educación Infantil.
Co lema "O Bibei navega pola igualdade" e a través de distintos contos, o noso alumnado traballou a igualdade de xénero, a cooperación, a empatía e o respecto, entre outros valores.
O noso agradecemento a Susana polo seu traballo e bo facer e á ANPA do CEIP Bibei por achegarnos unha vez máis actividades tan enriquecedoras para os nosos nenos e nenas.
Ao longo desta semana estamos levando a cabo no centro diversas actividades para conmemorar o Día Universal da Infancia (20 de novembro), e o Día Internacional Contra a Violencia de Xénero (25 de novembro).
Este luns e martes tivemos a sorte de contar con Noelia Moreau Castro (Graduada en Educación Social pola USC, Máster oficial en sexoloxía, educación sexual e asesoramento sexolóxico pola UCJC, axente de igualdade de xénero pola UEMC), que estivo desenvolvendo diversas actividades co alumnado de segundo e terceiro ciclo.
O martes pola tarde tamén se levaba a cabo unha charla na biblioteca do centro, impartidada tamén por Noelia, dirixida ás familias, e coa que igualmente os asistentes quedamos encantados.
Agradecerlle a Noelia a cercanía e claridade nas súas explicacións que deixaron ao alumnado con ganas de repetir; e moitas grazas á ANPA do CEIP Bibei por colaborar co centro e organizar este tipo de actividades tan enriquecedorar para o noso alumnado e o conxunto da comunidade educativa.
Como outros anos dende o CEIP Bibei desenvolvemos un programa centrado en accións solidarias que tratan de axudar dentro das nosas posibilidades ós demais.
O ano pasado, o noso alumnado recadou coa XIII Carreira Solidaria do CEIP Bibei a cifra récord de 1300 euros.
PARABÉNS!
A primeira actividade que queremos organizar este curso é o reparto deste diñeiro. Por iso, se coñecedes algunha ONG/Asociación coa que queres que colaboremos fáinolo saber.
PORQUE A META É A SOLIDARIEDADE!
Este ano a choiva non nos deixou subir ao campo de fútbol para celebrar o Magosto coma outros anos, pero festexámolo igual no cole.
Degustamos o típico menú de bolo preñado, empanada e froita para rematar cuns ricos bullotes asados.
E algúns dos nenos e nenas que nos recreos tocan a pandeireta ofrecéronnos un concerto para amenizarnos o xantar.
Un ano máis celebramos o Samaín no cole con diferentes actividades coas que pasamos unha xornada moi divertida.
O luns o alumnado traía ao cole as súas cabazas terroríficamente impresionantes!! Unhas verdadeiras obras de arte!
O Equipo de Normalización e Dinamización Lingüística organizou diferentes actividades nos días previos, e para o martes 31 preparáronnos uns divertidos obradoiros.
Dende Bibliobibei organizaron unhas sesións de contacontos nas que os maiores do cole lle achegaron a aventura de ler aos máis pequenos.
E na Área de Música e Danza creouse unha coreografía para a canción "Samaín" de Mamá Cabra, que bailamos todos xuntos no patio.
Como podedes ver, tivemos unha xornada moi entretida! Aquí vos deixamos unha mostra dela cunhas fotiños e un vídeo do baile.
Preme na imaxe
Preme na imaxe.
