BENVIDAS E BENVIDOS AO CURSO 2024 - 25

 Estimadas familias:

Comezamos un novo curso escolar con moita ilusión e co desexo de que todo se desenvolva coa maior normalidade posible. Temos a seguridade de que coa colaboración familia-escola todo vai saír ben. Dende o centro seguiremos poñendo todos os medios e esforzos posibles para garantir que os vosos fillos e fillas teñan o entorno máis seguro posible para o exercicio do seu dereito á educación.

O alumnado incorporarase ás aulas o vindeiro mércores, día 11 de setembro, tal e como se recolle na Orde do 12 de abril de 2024 pola que se aproba o calendario escolar para o curso 2024/25 nos centros docentes sostidos con fondos públicos na Comunidade Autónoma de Galicia.

O horario de entrada o día 11 será o seguinte:

3 anos: (horario de adaptación)

09:15h - 09:30h: Infantil 4 e 5 anos

09:30h - 09:45h: 1º e 2º Curso

09:45h - 10:00h: 3º e 4º Curso

10:00h - 10:15h: 5º e 6º Curso

O alumnado transportado e o alumnado de comedor poden facer uso de ámbolos dous servizos dende o primeiro día. 

NOTA RECORDATORIA: Lembren que está aberto o prazo para solicitar a colaboración no comedor escolar.

Un afectuoso saúdo.

FIN DE CURSO 2023-24

                             Chegamos a final de curso! 

 Para celebralo quixemos facelo cunha xornada lúdica e festiva.

Unha vez máis o equipo de Pinchacarneira axudou a que este remate fose especial.

                                  Bo verán!! Ata o vindeiro curso 2024-25!!

           As clases darán comezo o mércores, día 11 de setembro.

OS NOSOS GRADUADOS/AS

Un ano máis dúas xeracións celebraron o seu  acto de graduación no que foron os auténticos protagonistas.                                 

                          Moitos parabéns polos logros acadados!!

Viaxe a Madrid de 3º e 4º de Primaria

 Partimos do cole coa ilusión de vivir unha aventura máxica. 

Chegou o momento onde a maxia se fixo realidade, o Musical de Aladín transportándonos a un mundo de soños e aventuras. 

 Despois, o Museo das Ilusións, as nosas mentes marabilláronse con trucos e efectos que nos parecían imposibles. Finalmente, no Museo da Aeronáutica e Astronomía descubrimos como os soños poden levarnos ata as estrelas.

MAXIA, ILUSIÓN e VOAR, uníronse para regalarnos esta bonita experiencia.

                                                        

                                         Alumnos/as de 3º e 4º de E.P.

XORNADA DE CONVIVENCIA NA VEIGA

 O alumnado de Educación Infantil desfrutou onte dunha xornada de convivencia en A Veiga á que, ademais do colexio anfitrión, tamén se sumaba o de Vilariño de Conso.

A primeira hora realizaron a ruta da Cántara da Moura, un paseo ben bonito no que ao final do mesmo quedaron sorprendidos coa historia da lenda do lugar. De camiño ao mirador aprenderon moitas cousas sobre o importantes que son as abellas, e ata poideron degustar o delicioso mel que se fai nesta zona.

A segunda parte da excursión levouse a cabo en O Coiñedo, un lugar ben fermoso onde participaron en diferentes xogos para rematar compartindo un delicioso xantar.

Moitas grazas ao colexio de A Veiga por convidarnos e facer que os nosos nenos e nenas disfrutaran dun día diferente nun entorno espectacular.

                                                                                Preme na imaxe

OBRADOIRO DE HIXIENE BUCODENTAL

 Rematamos a semana  cunha actividade proposta pola nosa ANPA, uns obradoiros de hixiene bucodental nos que participaron todo o alumnado do centro.

Grazas á ANPA do CEIP Bibei por traernos actividades tan interesantes, e a Cristina, que coma sempre, fai que o noso alumnado, ademais de aprender, disfrute nos seus obradoiros.

PREMIO "¿QUÉ ES UN REY PARA TI?"

 No día de hoxe acudimos a Santiago de Compostela á recollida de premios da 43 edición do Concurso anual "¿Qué es un rey para ti?".

A alumna agraciada foi Aurora Margarita Montesinos Fúnez, de 5º de Educación Primaria, que participou cun traballo dixital moi orixinal sobre a figura do rei e a súa familia.

Parabéns, Aurora!

Agradecer e felicitar ao resto do alumnado de 5º e 6º polo seu esforzo e participación no concurso.

EXCURSIÓN DE 3ºCICLO Á ILLA DE ONS

 O alumnado de 5º e 6º fixo unha excursión á Illa de Ons.

Puideron coñecer de primeira man o primeiro Glamping autosostible de Galicia e o seu entorno, situado en pleno Parque das Illas Atlánticas.

Foi unha experiencia inesquecible na que, ademais, disfrutaron dun montón de actividades e da praia.  E o máis enriquecedor, relacionáronse e conviviron co resto dos compañeiros  nun entorno moi diferente ao habitual.

Sen dúbida, unha experiencia para repetir!!

"NON AO MALTRATO ANIMAL"

 Hoxe no CEIP Bibei recibimos unha visita moi especial. O alumnado de 1º da ESO veunos contar a cerca dun  proxecto propio que está a desenvolver en contra do maltrato animal e a favor do seu benestar e coidados.

A actividade informativa levouse a cabo en dúas quendas, unha para o  alumnado de 2º Ciclo de Primaria e outra para o de Educación Infantil, todos eles estiveron moi atentos a todo o que estes mozos e mozas lles contaron. Ademais, poideron xogar a diferentes xogos de taboleiros que lles trouxeron feitos por eles mesmos. E ao remate agasalláronos cunhas pegatinas reivindicativas tamén de deseño propio. 

Ao final da actividade, os nenos e nenas de 2º Ciclo tamén poideron escoitar o manifesto en contra do maltrato animal.

Sen dúbida, unha marabilla de mañá! Agradecidos quedamos por esta visita tan especial.

CARREIRA SOLIDARIA

 No CEIP Bibei rematamos a semana coa XIV Carreira Solidaria. 

A de hoxe foi unha xornada festiva e de convivencia, na que toda a comunidade educativa correu unida por unha causa solidaria, recaudar fondos para a Asociación Save The Children.

Grazas a todos e todas por acompañarnos nesta xornada tan especial e polas vosas aportacións.

                                                                          Preme na imaxe

CONCERTO MÚSICA TRADICIONAL

 Hoxe no CEIP Bibei tivemos a sorte de desfrutar da actuación do grupo infantil de pandeireteiras e pandeireteiros da Asociación Abaneo de Viana do Bolo.

Grazas a todos e todas por facernos pasar un rato tan agradable, especialmente á súa mestra Mariam Salgado. 

Poidemos comprobar que a música tradicional en Viana ten moito futuro!

COIDAMOS DO MEDIO

 Durante a semana, o noso alumnado tivo a oportunidade de participar en dous obradoiros a través dos cales aprenderon e reforzaron os seus coñecementos a cerca do coidado do medio ambiente.

Entendemos que é esencial que dende unha idade temperá o alumnado adquira conciencia ambiental. Este tipo de obradoiros permítelles comprender o importante papel que teñen na preservación do medio.

O primeiro deles tivo como obxectivo principal ensinar aos nenos e nenas a importancia das "3 erres": Reducir, Reutilizar e Reciclar. Foi impartido por Cristina, unha representante de Sogama, a Sociedade galega do Medio Ambiente.

Este obradoiro forma parte das diferentes actividades organizadas dende o Club da Ciencia.

No segundo taller, o axente medioambiental Xosé Manuel e os seus acompañantes transmitíronlles aos nosos nenos e nenas a importancia de coidar a natureza e o importante papel que teñen as árbores.

Distribuidos en tres grupos dende infantil ata 6º de primaria, o alumnado participou na plantación de varios bidueiros, árbore típica dos nosos ríos.

Grazas a todos eles por acompañarnos e transmitirnos os seus consellos e coñecementos para o coidado do medio.

LETRAS GALEGAS 2024

 Este ano adícanselle as Letras Galegas a Luisa Villalta. No CEIP Bibei quixemos conmemorar esta data con diferentes actividades.

Ademais do traballo realizado nas diferentes aulas, o mércores 15 asistiamos a un espectáculo de maxia na biblioteca do noso centro. O mago Martín deixounos impresionados cos seus números, que tiñan como fío condutor á autora Luisa Villalta.

Na xornada de hoxe recibiamos aos colexios de Vilariño de Conso e A Veiga para festexar todos xuntos as nosas Letras.  

Dabamos comenzo a esta xornada conmemorativa coa interpretación dun fragmento do Himno Galego a cargo do alumnado de 6º de primaria, ao que se sumaría o alumnado de 5º para ir adentrándonos máis nesta xornada festiva ao ritmo da popular canción "A saia da Carolina". 

Ao ritmo da "Muiñeira de Limiñoa" de Xabier Díaz e Adufeiras de Salitre, o alumnado de primaria pechaba as actuacións musicais e dáballe paso á parte máis lúdica da xornada, unhas  rotacións por diferentes talleres que o Equipo de Normalización e Dinamización Lingüística nos preparou e coa que nos divertimos moito.

                                                               Preme na imaxe

 

DÍA DO LIBRO

 Nesta semana tan especial, a Semana do Libro, acompañounos Manuel Fontemoura, autor do libro A nena do vestido de flores. 

Aprendemos que  todos somos iguais e, ao mesmo tempo, diferentes. Non queremos esquecer o que nos dixo cando se despediu: "Ningún neno só nin ningunha nena soa no patio".

Ademais, tivemos a sorte de que nos asinou os nosos libros de A nena do vestido de flores.

Grazas, Manuel, por compatir este día con nós. E, grazas tamén á Editorial Aira, por poñernos en contacto con Manuel.

InnovArt 2024

 Este ano tamén quixemos estar presentes en Innovart. O alumnado de 1º, 3º e 4º desfrutou desta segunda edición de InnovArt 20224, na Cidade da Cultura de Santiago de Compostela, onde participaron activamente en diversas actividades artísticas e musicais: obradoiros de percusión corporal, danza creativa, construción de instrumentos; e asistiron a diferentes actuacións musicais: actuacións corais, ensemble de guitarras, representacións operísticas, etc.

Aproveitamos a viaxe á capital galega para facer un percorrido polas rúas e prazas máis emblemáticas  da mesma, e poidemos merendar no Parque da Alameda mentres desfrutabamos das impresionantes vistas á Catedral de Santiago.

Tamén fomos visitar o Museo do Pobo Galego, onde quedamos abraiados coa riqueza da nosa cultura e o legado material do noso pobo.

Sen dúbida, unha xornada moi enriquedora para complementar as aprendizaxes dos nosos nenos e nenas.

                                 Preme na imaxe

NAVEGA CON RUMBO

 Hoxe o alumnado de 5º e 6º de primaria asistía a unha charla do Plan Navega con Rumbo.

Deste xeito, o alumnado recibía recomendacións de como navegar con seguridade pola rede, evitar o ciberacoso e outros riscos da Internet. 

"NATURÉZATE"

 Hoxe o alumnado de 3º, 4º, 5º e 6º desfrutou dunha charla sobre a vida nos ríos galegos, o río Sil, enmarcada dentro do programa Proxecta "Naturézate" no que participa o centro.

"DONAS DE SÍ"

 Hoxe o alumnado de 4º, 5º e 6º desfrutaron coa Compañía "Polo correo do vento" da biografía de Luisa Villalta (homenaxeada nas Letras Galegas 2024), acompañados ademáis pola ilustradora Tania Solla, coa que aprenderon a facer un retrato da autora.

 Esta actividade está inmersa no Programa Proxecta "Donas de sí" no que participa o noso centro este curso.

 Moitas grazas a Quique e a Tania polo seu traballo.

XORNADA DE EDUCACIÓN VIAL

 Onte desfrutamos no CEIP Bibei dunha Xornada de Educación Vial na que tamén nos acompañaron os colexios da Veiga e de Vilariño de Conso.

O programa impulsado pola Deputación Provincial de Ourense acercounos ata o centro diferentes servizos: Garda Civil de Tráfico, Policía Local, Servizo Sanitario do 061, Protección Civil, os GES da Veiga e A cruz Vermella. Todos eles transmitíronnos coñecementos, habilidades e valores que son fundamentais para a seguridade e o benestar na vía pública, así como para a creación dunha cultura vial máis segura e respetuosa na sociedade en xeral.

Moitas grazas a todos eles, así coma o Concello de Viana do Bolo pola súa implicación.

                                                                         Preme na imaxe

XOGANDO AO ATLETISMO

Hoxe, xoves 14 de marzo, o alumnado de 3º, 4º e 5º de Educación Primaria foron a Ourense para participar na xornada deportiva de "Xogando ao atletismo" no recinto de atletismo de Expourense.

Os nosos nenos/as participaron en varias modalidades de atletismo (salto de altura, salto lateral, lanzamento de xavelina, resistencia e lanzamento de balón medicinal) e desfrutaron competindo e mellorando as súas habilidades motrices de diversas formas.

Ademais de achegarnos de forma lúdica e iniciarnos no atletismo, aprendimos moitos valores e dimos exemplo ca nosa actitude e comportamento.

Dita actividade atópase recollida dentro do Plan de Actividades Físicas e Saudables do centro para desenvolver o programa de Proxectos de Vida Activa e Deportiva (Xogade) na que o centro está a participar.

 

CONMEMORACIÓN DO 8M

 Con motivo do Día Internacional da Muller tivemos no CEIP Bibei unha xornada moi especial na que se levaron a cabo dous obradoiros.

O alumnado de 5º e 6º participou no escape room "Estrelas". Unha experiencia de escapismo onde algunhas das mulleres máis  apaixoantes da historia foron as protagonistas (Isabel Zendal, Ada Lovelace, Agatha Christie, Nefertiti...)

Pola súa parte, o alumnado dende Educación Infantil ata 4º de Educación Primaria desfrutou da obra de teatro "O Ratiño Presumido", que lle dá unha volta ao conto tradicional "A Ratiña Presumida", desterrando todo tipo de estereotipos de xénero.

Moitas grazas ao CIM, que coma sempre todas as actividades que propón son un acerto.

REGUEIFEIROS E REGUEIFEIRAS DO BIBEI

Deixámosvos o fantástico traballo co que  o alumnado de 6º de Primaria acaba de participar  no Certame Enreguéifate 2023-24. 

Noraboa a todos e todas!

DÍA DE ROSALÍA

 Hoxe  no CEIP BIBEI celebramos o día de Rosalía de Castro. Tivemos que pospoñelo por mor da choiva, pero mereceu a pena porque o sol acompañounos nesta xornada para que poideramos saír a cantar entre todos "Adiós ríos, adiós  fontes", a versión de Astarot.

Tamén poidemos degustar o "Caldo de Gloria" todos xuntos no comedor escolar, que con tanto cariño nos preparon Maite e Rocío, e que coma sempre estaba boísimo. Moitas grazas ás dúas!

O propio día de Rosalía, o venres 23, o alumnado presentaba uns fermosos carteis que elaboraron por aulas sobre a autora homenaxeada.

OBRADOIRO DE PRIMEIROS AUXILIOS

 Esta semana alumnado de 3º curso de primaria asistía a un obradoiro de primeiros auxilios impartido por un equipo de  profesionais de enfermaría pertencentes á Área sanitaria Ourense, Verín e o Barco de Valdeorras. Unha experiencia moi enriquecedora, na que a través do xogo e a colaboración aprenderon nocións básicas de como actuar ante determinadas situacións que poidan afectar á súa saúde e a das persoas que os rodean..

Pola tarde sería  o profesorado o que recibía a formación, moi interesante para a atención ao noso  alumnado en caso de situacións de emerxencia. 

A vindeira semana será o alumnado de 4º curso quen participe no mesmo obradoiro, enmarcado dentro do Proxecto de Primeiros Auxilios que o Servizo Galego de Saúde destina a nenos e nenas de 3º e 4º de  educación primaria.

Moitas grazas ás profesionais que nos acompañaron.

ENTROIDO 2024

 Como xa é tradición, o Xoves de Compadres dabamos comezo ás actividades do Entroido cunha ronda de fulión  polas rúas de Viana e visitando as residencias de maiores. Tiñamos por diante unha semana na que a tradición e o fulión serían os protagonistas. Seguindo os ditados das Mandas cada día chegabamos ao centro vestidos dun xeito peculiar, e durante os recreos o fulión acompañaría o noso tempo de lecer.

Este ano o sol non quixo acompañarnos no Xoves de Comadres, pero eso non foi impedimento para disfrutar con ilusión da xornada e  de todos os que nos poideron acompañar, especialmente ao IES Carlos Casares e ao CEIP San Martiño de Vilariño de Conso.  Moitas grazas a todos e todas!

 E para rematar a semana... que mellor maneira  que facelo cun chocolate e unha festa de disfraces! Ademais, tivemos a sorte de desfrutar duns versos que prepararon  os nenos e nenas de 6º de primaria.

Premede na imaxe para ver o que vivimos nestes días. 

                                           Que viva o Entroido, 

                                            que viva a tradición.

                                            Desfrutemos estes días

                                            tocando o fulión.

                                              Preme na imaxe

ESQUIOU-MANZANEDA 2024

 Hoxe, 42 alumnos e alumnas do CEIP Bibei dende  3º a 6º de primaria, voltaban dunha estadía de tres días na estación de montaña de Manzaneda, saída enmarcada no programa “Esquiou” da Deputación de Ourense.

Á falta de neve, o alumnado participou de diferentes actividades das que desfrutaron moitísimo: supervivencia, preesky, tiro con arco, parque multiaventura, piscina e para rematar a visita…Baile na disco!!!

Durante a estancia coincidiron co outros dous centros,  polo que tamén tiveron oportunidade de facer novas amizades.

Sen dúbida, experiencias que complementan e enriquecen a súa formación.

XOVES DE COMPADRES

 Un ano máis o alumnado do Ceip Bibei percorreu as rúas de Viana neste Xoves de Compadres, no que visitamos as dúas residencias de maiores da localidade. Moitas grazas ao personal delas pola boa acollida que nos deron.

O noso agradecemento tamén ao Concello, Protección Civil, Policía Local e Garda Civil pola súa axuda e sempre boa disposición.

Preme na imaxe

DÍA DA PAZ

 Hoxe conmemoramos o Día Escolar da Non Violencia e da Paz co noso fulión particular "O Son da Paz", un fulión integrador, diverso, amable, acolledor ... espello vivinte dos valores da nosa escola.

OBRADOIRO DE IMPROVISACIÓN ORAL

 Esta mañá o alumnado de 5º e 6º tivo a sorte de participar nun obradoiro de improvisación oral e regueifa con Sechú Sende e a súa filla Maré a Muda

Unha sorte contar con eles, que acercaron ata as nosas aulas o coñecemento sobre as diferentes formas de improvisación oral que temos en Galicia.

Unha xornada moi frutífera, na que os nenos e nenas se animaron á  improvisación colectiva sobre temas da actualidade, facendo preceder cada intevención dun... Bomba!, coa finalidade de pedir silencio e respecto  aos asistentes para escoitar os "versos" improvisados polos grupos.